कांग्रेसले दियो टीवीकेलाई समर्थन गर्ने संकेत

काठमाडौँ : कांग्रेसले तमिलनाडुमा अभिनेता विजय थलापतिको पार्टी तमिलगा वेत्री कझगम (टीवीके)लाई समर्थन दिने संकेत दिएको छ ।
कांग्रेसका महासचिव केसी वेणुगोपालका अनुसार टीवीके प्रमुख विजयले सरकार गठनका लागि कांग्रेससँग समर्थन मागेका छन् ।
वेणुगोपालले भने, ‘कांग्रेसको स्पष्ट धारणा छ कि तमिलनाडुमा जनादेश धर्मनिरपेक्ष सरकारको पक्षमा छ, जसले संविधानको भावना र शब्द दुवैको रक्षा गर्ने प्रतिबद्धता राख्छ ।’
उनले थपे, ‘कांग्रेस चाहन्छ कि भारतीय जनता पार्टी र उसका सहयोगीहरूले कुनै पनि रूपमा तमिलनाडुको सरकार सञ्चालन गर्न नसकून् । थिरु विजयले पनि कामराजबाट प्रेरणा लिने कुरा बताएका छन् ।’
वेणुगोपालका अनुसार, कांग्रेस नेतृत्वले तमिलनाडु कांग्रेस समितिलाई चुनावी जनादेशमा देखिएको जनभावनालाई ध्यानमा राख्दै थिरु विजयको प्रस्तावबारे अन्तिम निर्णय लिन निर्देशन समेत दिएको छ ।
टीवीकेले तमिलनाडुको २ सय ३४ सिटमध्ये १ सय ८ सिट जितेको छ । सरकार बनाउन १ सय १८ सिट आवश्यक पर्छ । कांग्रेसले भने ५ सिट जितेको छ ।