ट्रम्पले लगाएका अधिकांश भन्सार शुल्क गैरकानूनी घोषणा

एजेन्सी : अमेरिकी पुनरावेदन अदालतले राष्ट्रपति डोनाल्ड ट्रम्पले लगाएका अधिकांश भन्सार शुल्कहरूलाई गैरकानूनी घोषणा गरेको छ ।
अदालतले ट्रम्पले लगाएका भन्सार शुल्कलाई आपतकालीन आर्थिक शक्ति ऐनविपरीत भएको ठहर गरेको हो । यो निर्णयले चीन, मेक्सिको, क्यानडा लगायत अधिकांश देशहरूमा लगाइएको अत्यधिक भन्सार शुल्कलाई प्रभाव पार्ने अनुमान गरिएको छ ।
अदालतले भन्सार शुल्क लगाउने निर्णय संसदमा निहीत रहेको र राष्ट्रपतिको अधिकार नरहेको ठहर गरेको छ । पुनरावेदनको यो निर्णय १४ अक्टोबरदेखि कार्यान्वयनमा आउनेछ, जसले राष्ट्रपति प्रशासनलाई सर्वोच्च अदालतमा पुनरावेदन गर्न समय दिन्छ । ट्रम्पले आफ्नो सामाजिक सञ्जाल ट्रुथ सोसियलमार्फत् अदालतको आलोचना गर्दै यस्तो निर्णयले कायम रहेमा अमेरिकालाई पूर्ण रूपमा नष्ट गर्ने जिकिर गरेका छन् ।

यस फैसलाले केही देशहरूसँग शुल्क घटाउने सन्दर्भमा गरिएको सम्झौतामा पनि प्रश्न उठाएको छ। यो मुद्दा सर्वोच्च अदालत पुग्ने सम्भावना देखिएको छ, जहाँ ट्रम्पले नियुक्त गरेका तीन सहित ६ जना रिपब्लिकन न्यायाधीश छन् ।